1Ch 23 | HMO | STEP | Davida ia buruka, bona iena mauri lagani be momo herea neganai, ia ese iena natuna tau Solomona be Israela ena king ia halaoa.

1 Chronicles 23

1 Davida ia buruka, bona iena mauri lagani be momo herea neganai, ia ese iena natuna tau Solomona be Israela ena king ia halaoa.

Levi taudia edia gaukara

2 Davida ese Israela lohia taudia, bona hahelagaia taudia, bona Levi taudia, ibounai ia haboua. 3 Levi taudia, edia mauri lagani 30 idia hanaia taudia, be ia duahia, ibounai be 38,000. 4 Davida ia gwau, “Inai Levi taudia edia gaukara be inai: Idia 24,000 be Lohiabada ena Dubu Helaga naria gaukara do idia karaia. Idia 6000 be buka naria gaukara bona kota biaguna gaukara danu do idia karaia. 5 Idia 4000 ese Dubu Helaga gimaia gaukara do idia karaia, bona ma 4000 be gita bamona gaudia, bona miusiki gaudia, lau ese lau karaia gaudia, dekena amo Lohiabada do idia hanamoa.”

6 Davida ese Levi taudia be orea toi dekenai ia haridia, Geresone, Kohata, bona Merari, edia bese hegeregerena.

7 Geresone ena natuna tau be Ladana bona Simei. 8 Ladana ena natuna tau be toi, Iehiele, Setama bona Ioela. Iehiele be edia lohia. 9 Simei ena natuna tau be toi, Selomoto, Hasiele, bona Harana. Idia be Ladana ena iduhu edia lohia taudia. 10 Ma Simei ena natuna tau be 4, Iahata, Sina, Ieusu, bona Beraia. 11 Iahata be edia lohia tauna, bona iena iharuana be Sina. To Ieusu bona Beraia edia natudia tau be momo lasi. Unai dainai idia be iduhu tamona sibona idia gwauraia.

12 Kohata ena natuna tau be 4, Amarama, Isahara, Heberona bona Usiele. 13 Amarama ena natuna tau be Arona bona Mose. Arona bona iena bese taudia be Lohiabada ese ia abia hidi, idia ese Dubu ena helaga herea gaudia do idia hahelagaia, boubou gaudia Lohiabada dekenai do idia henia, bona muramura mai bonana namona Lohiabada ena vairanai do idia gabua, ela bona hanaihanai. Ma idia ese Lohiabada ena tomadiho gaukara do idia karaia, bona Lohiabada ena ladana dekenai taunimanima do idia hanamoa.

14 To Mose, Dirava ena tau, ena natuna tau be Levi orea taudia danu idia haboua. 15 Mose ena natuna tau be rua, Geresome bona Eliesere. 16 Geresome ena natuna tau edia lohia be Sebuele. 17 Eliesere ena natuna be tamona sibona, Rehabaia, to Rehabaia be mai ena natuna tau momo herea.

18 Kohata ena natuna iharuana, Isahara ena natuna tau be Selomiti, iduhu ena lohia tauna. 19 Kohata ena natuna ihatoina, Heberona ena natuna tau ibounai be 4, Ieraia, Amaraia, Iahasiele, bona Iekameama. 20 Kohata ena natuna namba 4, Usiele ena natuna tau be rua, Mika bona Isihaia.

21 Merari ena natuna tau be rua, Mali bona Musi. Mali danu ena natuna tau be rua, Eleasara bona Kisa. 22 Eleasara ia mase neganai ia be mai ena natuna tau lasi, to natuna hahine sibona. Vadaeni inai natuna hahine taudia ese idia edia varavara, Kisa ena natuna tau, idia adavaia. 23 Musi ena natuna tau be toi, Mali, Edere, bona Ieremoto.

24 Levi ena bese taudia be unai, edia iduhu ta ta dekenai. Idia be edia iduhu edia lohia taudia, bona idia ta ta, edia mauri lagani 20 idia hanaia vadaeni taudia be buka lalonai edia ladadia idia torea vadaeni, Lohiabada ena Dubu Helaga ena gaukara do idia karaia totona.

25 Badina be Davida ia gwau, “Lohiabada, Israela ena Dirava, ese iena bese taudia dekenai maino ia henia, bona ia, Dirava be Ierusalema dekenai do ia noho ela bona hanaihanai. 26 Unai dainai Levi taudia ese Palai Dubu, bona iena gaukara kohu, do idia huaia lou lasi.”

27 Davida do ia mase lasi neganai, iena hereva dokona ta be Levi taudia, edia mauri lagani 20 idia hanaia taudia ibounai be gaukara totona edia ladana do idia torea. 28 Edia gaukara be inai: Arona ena bese taudia do idia durua, Lohiabada ena Dubu Helaga ena tomadiho gaukara totona, Dubu ena ariara magu bona daiutu do idia naria, gau helagadia do idia hagoevaia, bona Dirava ena Dubu Helaga ena gaukara idauidau do idia karaia. 29 Bona paraoa helagana, bona boubou totona paraoa, bona idia hatubua lasi paraoa keke, bisikesi, bona olive dehoro dekenai idia mikisi paraoa boubouna, bona inai gau ibounai edia bada bona edia metau, be Levi taudia ese do idia karaia bona naria.

30 Daba ibounai bona adorahi ibounai, Levi taudia ese do idia gini, Lohiabada do idia hanamoa, bona iena ladana do idia abia isi. 31 Sabati Dinadia, Hua Matamata Aria neganai, o Dubu ena aria ta neganai, Levi taudia ese inai Lohiabada hanamoa gaukara do idia karaia. Taravatu ese ia gwauraia Levi taudia hida ese inai gaukara do idia karaia hegeregerena, do idia karaia. Levi taudia danu edia gaukara be Lohiabada do idia tomadiho henia noho nega ibounai.

32 Unai dainai Levi taudia ese Palai Dubu bona Helaga Gabuna naria gaukara do idia karaia noho, bona edia tadikakadia Arona ena bese taudia edia henunai, hesiai gaukara do idia karaia, Lohiabada ena Dubu Helaga lalonai.